Ua faasolo pea ona tatala ofisa tutotonu e tapuvae tasi iai galuega tau i le pulea o le fuafuaga a le Malo mo le atiina’e e tasi le miliona mo itumalo faapalota e 51, e pei ona tatala aloa’ia i le Aso Toonai na tea nei, le ofisa tutotonu o le itumalo faapalota o Gaga’emauga Numera 2 lea o loo tulai mai ai le sui faipule o se tasi o minisita lagolago le tofa Seuamuli Fasi Toma.

O lea faamoemoe tāua sa auai nisi o minisita o le kapeneta faapea le paia maualuga o lea itumalo faapalota. O loo faatino galuega o le fausia o ofisa tutotonu o nisi o itumalo ua mautu a latou komiti ma ua mae’a ona lesitala faaletulafono, auā tasi lea o aiaiga tāua e ao ona tausisia a o lei faamatuuina atu e le Matagaluega o Tupe a le Malo le tupe faavae e 200 afe mo le tapenaina o ofisa tutotonu.

O le tala o le tupe autu lona lua na pasia e le Fono Aoao Faitulafono i le vaiaso ua mavae, ua aiaia ai vaega tupe tai miliona tala mo itumalo uma e 51 mo a latou atiina’e e tatau ona faatino i totonu o le 12 masina o le tausaga faaletupe fou ua amatalia i le masina nei o Iulai e mae’a i le faaiuga o le masina o Iuni o le tausaga fou 2023.