O le afioga i le Tamaitai Palemia, Fiame Naomi Mata’afa na fofogaina le saunoaga autū e tatala aloa’ia ai ma faamanuia le atina’e fou o se leitio faasalalau i Salafai, o se faama’ite tāua ua amatamea ai le itumalo o Gagaemauga Numera 1.

Na ta’ua i le saunoaga a le afioga i le Palemia, o lenei auaunaga tau leitio o le a aogā tele mo le faasalalauina ma faasilasila soo se polokalame poo meafai i totonu lava o le itumalo, o faasilasilaga e fia vave ona faaoo atu a le malo e lē gata mo le itumalo a o isi foi itumalo uma i totonu o Salafai ma le atunuu atoa.

O le a aogā mo le faasalalauina o polokalame tau soifua maloloina, o polokalame tau a’oa’oga, o le faasalalauina o fonotaga a le Palemene, o polokalame o Ulua’i Seleselega, ma le tele o isi polokalame tāua a le Malo e ao ona vave silafia e tagata uma o le atunuu.

O le Siufofoga o Gagaemauga Numera Muamua, o le a avea ma auala o faasalalauga o soo se fuafuaga fai a le itumalo, e oo foi i faasalalauga tuusa’o i taimi lava o loo faatino ai se faamoemoe poo live stream o le a mafai ona faatino e pei ona ua taatele nei le faia o Tausala Online i fesootaiga vavave faaonaponei, ae o lea o le a atili faafaigofie i le leitio faasalalau a le itumalo.

Na momoli ai le faamalo a le afioga i le Palemia i le alii faipule o Gagaemauga Numera Tasi, o le Sui Palemia foi lea, le Afioga Tuala Iosefo Ponifasio, ona o lona faama’ite i lea atina’e tāua auā e lei faia lava e se isi sui faipule o le itumalo lenei atina’e, ae atonu o le agaga o le Faipule ina ia avatu faamatalaga sa’o i totonu o le itumalo.

E mafai foi ona oo atu le malosi o faasalalauga a le leitio i isi atunuu mamao e faalogologo mai ai tagata o le itumalo ma le atunuu i meafai o loo tutupu i totonu o le itumalo.

O se taimi mulimuli ane o le a toe faalauiloa mai ai fuafuaga uma ma polokalame faagasolo o lea alaleo faasalalau.

O lenei atina’e a le itumalo, le Siufofoga o Gagaemauga Numera Muamua 88.0 FM, o se vaega o poloketi a le itumalo o loo faaaogā i ai se vaega tupe mai le latou miliona tala.