Ua tatala nei i le itu i Sisifo o Sini le pisinisi o loo avea ai le alii taalo a Ausetalia o Nathan Cleary ma se tasi o pule o le pisinisi.
O Penrith lava, le pitonuu o le alii taalo lea o loo faatuina ai lea pisinisi o se fale gaosi avamalosi, o le Drink West ma ta’ua ai e Cleary e malosi tele le sootaga o ia ma le West.
O ana paaga faapisinisi e pei ona lipotia e le 9News e aofia ai le alii fusu i le UFC o Tai “Bam Bam” Tuivasa ma Tyson Pedro, o le toalua lea na soifua ane foi i Western Sydney e pei ona faailoa.
Fai mai Tuivasa i le lipoti lea na te iloa o lenei pisinisi o se mea e ao ona mitamita ai.
Ta’ua e Cleary o le falegaosi avamalosi o se vaega o se nofoaga faapisinisi i Penrith e faaigoa o le Manufactor lea e gaosia ai e pisinisi oloa mo a latou paaga ma ua faailoa e 14 pisinisi ua iai nei lisi ma agai atu i lea nofoaga.
Ua faailoa e le alii talavou faipisinisi e oo ane i le taimi e mae’a ai a latou taumafaiga i ia faamoemoe pe ā ma le 800-900 avanoa faigaluega o le a maua ai mo tagata o le latou komiuniti.
