O le lua lenei o tausaga i le tau e ta ai le palolo ua faatino e le Faalapotopotoga o Faletalimalo faapea le atinae o tagata tafafao o le motu o Savaii le faaliga e faataua ai le mataiai o le palolo.

O se taumafaiga lenei ua faaalia e le Peresetene o le Faalapotopotoga o Tagata Tafafao i Salafai le susuga Tupai Saleimoa Vaai e taumafai ai pea e toe faaolaola le agaga fetauisia’i ma le feasiasia’i o aiga Samoa pe a oo mai le taimi o le palolo.

O le faapitoa lenei a faletalimalo i Savaii ma faleapitaga tu matafaga i lenei masina faapea le masina fou o Novema ua faaalia ua tumu potu ona ua faapa’ū maualalo le tau ma ua lē gata o le au tā palolo ma tagata tafafao ua maua ai lea avanoa ae ua faia tonu ai i lenei taimi o fonotaga ma isi faamoemoe ai maua le pa’ū i le tau o ia auaunaga tau tagata tafafao.

Taua e le Minisita o Tagata Tafafao Maimoa mai Fafo i le tatalaina o le Palolo Festival i Salafai “O le i’a lenei o le palolo o se tasi o mataiai o le atunuu, e feiloai ai foi i aiga e pei o le tausaga ua mavae e faapea ona feofoofoa’i ma fetaaloloa’i aemaise lava i afioaga ma aiga e maua ai le palolo ona feiloai lea o aiga.

O le taua foi lea o lenei vaitau e faatulaga ai foi le feiloaiga e le gata o tagata tafafao ma maua ai foi le avanoa tatou te maitau ai ma maua ai a tatou Mālō mai fafo”.

O le i’a o le palolo e tele ina maua i le masina o Oketopa ma Novema ma o se vaega taua i le aganuu faasamoa e ala lea i le omai faatasi e le gata o nuu, aiga ma Ekalesia auā e na’o le pa’u Ia o masina e a’e ai.

O lenei la vaega taua o se gaioiga a Faalapotopotoga o faletalimalo i Salafai ina Ia toe faataua le mataiai a le atunuu o le Palolo ma faailoa foi i le lalolagi nei agaifanua a Samoa.