Ua tele ma anoanoa’i le sao o le Faletupe o Atinae a Asia mo Samoa talu mai ona avea ma se tasi o sui faavae mai lava i le 1966.

O le aso ananafi na tatala ai le ofisa o lea faletupe i le maota o le faletupe tutotonu o Samoa.

Ua faailoa e le alii sui peresitene o le tatala ai o lenei ofisa fou o le a atili ai ona siitia le tali mai a lea faletupe i le atinae o le atunuu aemaise o le galulue faatasi ai ma lo tatou malo.

Na faaalia e le alii Minisita o Tupe le Tofa Lautimu’ia Afoa Uelese Vaai o loo taulai le vaai a lo tatou malo i le fesoasoani mai a lea faletupe i atinae o malosiaga faafouina, o felauaiga i le eleele ma le sami, soifua maloloina ma fesoasoani i tulaga faaleleia ona o suiga o le tau.

Ae o loo agai galuega a lea faletupe i tulaga tau galuega tetele tau felauaiga ma ala tetele, o le toe fuataina o faiga faavae, faamalosia atinae tau puipuiga mai suiga ogaoga o le tau, ma pisinisi tuma’oti.

E silia i le 400 miliona tala nonogatupe ua faamatuu mai e lea faletupe mo Samoa, o nonogatupe faaopoopo ma fesoasoani faamatuu mai lea e silia i le 300 miliona tala. 

O le mau tauave a lea faletupe o loo taumafai ia ausia faamanuiaga ia aufaatasi ma faatumauina le Asia ma le Pasefika a o taumafai ai e tafi ese le mativa.

O lea faletupe o loo pulea e le tusa ma le 68 sui o le 49 o ia sui e mai le itulagi lenei.