O le faamanatu ai e le malo o Saina o la latou tausaga fou ua aulia, ua tatala ai ma faitotoa o le nofoaga ua mae’a fausia o le amepasa o lea malo i Samoa nei.
Sa valaaulia e lea malo le faigamalo a Samoa amata mai le Afioga i le Ao o le malo ia Tuimalealiifano Vaaleto’a Sualauvi II ma lana Masiofo faapea le sui o le fono o Sui tofia ia Le Mamea Tuiletufuga Mualia ma lona faletua aemaise le Palemia ma Minisita o le Kapeneta faapea le Fofoga Fetalai o le Palemene, faauluuluga o Matagaluega ma faalapotopotoga a le malo faapea le Tausala o Samoa.
O le nofoaga na amata ona galuega i le tausaga 2021 peitai na tolo ona o le faama’i o le Koviti ma faamae’a ai i le faaiuga o le tausaga ua mavae.
Sa faailoa e le Tamaitai Palemia ia Fiame Naomi Mataafa le amata mai o le faiga paaga faavaomalo a Samoa ma lea atunuu o se uo e faalagolago iai lo tatou atunuu i le tele o vaega e pei o lana fesoasoani i tulaga tau le soifua maloloina, o lana fesoasoani mo tagata o lo tatou atunuu i le taimi o le misela i le 2019 o le Koviti i le 2020.
O aoaoga, o faatoaga, o le tulaga tau taaloga, faapea le faaleleia o tulaga tau turisi.
O le 1975 na amata ai le faiga paaga faavaomalo ma Samoa a lea malo, o le uluai ofisa sa amata ai Saina i Samoa nei o le maota o Betty Moors i Matautu a o lei see atu ai i Vailima i le 2006 ma faapea ona toe see atu ai i Avele ina ua atoa ai le 50 tausaga o le sootaga ma lo tatou atunuu.
Saunoa Fiame e tāua lenei taimi e toe tagai ai i le mamao ua oo mai iai la tatou mafutaga ma lea malo e ala lea i le asia o faamoemoega lelei sa taulai iai le vaai, o tagata, o le filemu ma faamanuiaga ia mautinoa e aogā ma faaauauina pea.
O lea sauniga sa faafeiloai ai foi ma le amepasa fou o lea malo i Samoa.
