Ua talia e le faamasinoga i le talosaga e tatala i tua le toatasi o matai matua o Lefagaoalii, ae ua teena le tatala i tua o le isi toasefulu e aofia ai nisi matai ma ni taulelea o lea lava afioaga, o i latou o loo faatali i so latou faasalaga ina ua latou ioe i le solitulafono o le ave faamalosi o se tagata ma le moliaga o le faaoolima.

O le aoauli o le Aso Tofi o lenei vaiaso na aumai ai lea faaiuga a le afioga i le faamasino o le faamasinoga maualuga, susuga Leiataualesa Darrel Clarke. O i latou ua faaauau ona nofo taofia pea seia oo ia Fepuari o le tausaga fou lea ua suia iai le taimi e lau ai se faasalaga, o le a toe tūtūla’i ile faamasinoga i le Aso Faraile a sau mo le sa’ilia o se aso tonu o Fepuari e lau ai le togisala, aemaise o le a faamautū ai nisi o finauga a le loia o loo tulai mo i latou o loo molia.

Advertisement

O i latou ua nofo taofia pea ua faaalia i le faaiuga o le talosaga e tatala i tua, e maualuga le tulaga e nofosala ai i le falepuipui pe a faia se faasalaga. E mafua lea tulaga i le silasila a le faamasinoga ona o le gaioiga na latou faatino, aemaise o taulele’a na latou usitaia le finagalo o alii ma faipule ina ia saisai i se amo lē na aafia ma sa’esa’e atu i le nuu.

O lē ua tatala i tua o le silasila a le faamasinoga e itiiti sona aafiaga i le faatinoga o le solitulafono o le ave faamalosi o se tagata poo le kidnapping, ma ua poloa’ina ai le tamā o Salapo Etene Uini 60 ma ona tupu tausaga o le soifua, ia nofo i lona tuafafine i Vaimoso ma tuuina atu lona tusifolau e taofia i le ofisa o faamasinoga.

Ua poloa’ina foi e sā ma tapu ona toe ulufale i lo latou nuu o Lefagaoalii ma taofia lona talanoa pe feiloai i tagata ua avea ma molimau a leoleo. Mo le silafia e iai le isi matai matua o lea afioaga o loo tatala foi i tua ini aiaiga, o ia lea o Aitauia Ioasa Lemau 70 ma ona tupu tausaga o le soifua o loo ia ioeina foi le moliaga o le ave faamalosi o se tagata. Peitai o loo ia teena le moliaga o le faia o se faamata’u e faaoo le oti i le matai na aafia.

O i latou ua nofo taofia pea seia oo ia Ferpuari e lau ai se faasalaga mo i latou, o;

Vaele Iosia Reupoamo,

Tauti Tiaka,

Toemago Pa’u Lasalo,

Lemana Nouata,

Ofisa Sitafao,

Vaa  Alai,

Amiga Lagaaia,

Tomasi Samuelu,

Faavevela Lale poo Tuua Lale, ma

Lemana Faleupolu Pene.