E to’a fitu sui o le pasese mai Brisbane Ausetalia lea na aafia i le Koviti19 ua tatala i tua i o latou aiga ina ua manuia.
O le tala lata mai lea mai le Komiti o Faalavelave Faafuasei i se pepa o faamatalaga faalauaitele. Ua faaalia e le faasalalauga o le to’alima sa faanofoesea i nofoaga i Faleolo lea o loo iai le falemai faaitumalo a’o leisi toalua sa faanofoesea i le nofoaga faapitoa i Motootua.
E le’o faailoaina mai pe e ese le to’afitu lea ese le to’afa ua malolosi ma ua le’o toe aafia i le siama o le faama’i lea na faailoa e le tamaitai Palemia i le faaiuga o le vaiaso ua mavae.
Ae i le malaga faapitoa mai Niu Sila le Aso Toanai na te’a nei e to’a 272 le aofai o le pasese na malaga mai ai ma ua faailoa e leai ma se tasi o aafia i le siama ina ua maea a latou suesuega poo tests ina ua taunuu le faigamalaga i Faleolo.
E tolu vaiaso o loo faanofoesea ai i latou ma ua faagasolo ai ma latou suega. I le aufaigaluega to’a 134 o muaau poo frontliners sa galulue i le siaki ina o lea faigamalaga ua faailoa e le Ofisa Tutotonu o galuega laveai i taimi o Faalavelave Faafuasei ua faanofoesea foi i le fuafuaga ia malu puipuia pea le atunuu atoa mai le po atu iai o le siama koviti19.
