Ma o lea nofoaga na fausia i le tau e 11 miliona tala lea sa faatupe e le Pulega o Malae Vaalele a Samoa. O le amataga o le vaiaso nei na amata faaaoga ai le nofoaga mo malaga e valu in le aso a le Talofa Airways, lea ua faaaoga uma ai ona vaalele laiti.
O le kamupani vaalele o le Talofa Airways ua faamauina i tala faasolopito ua ia amataina ni faiga malaga ile va o Samoa ma Amerika Samoa mai le nofoaga fou mo malaga faavaomalo mai Faleolo le Regional Terminal.
I se pepa o faamatalaga mai le Pulega o Malae Vaalele o loo faailoa ai o auaunaga uma e pei o le tiute, o le vaaia uta, le vaega o femalagaiga ma le puipuiga ua iai uma i lea nofoaga fou auā le tautuaina o le atunuu femalagaa’i.
Faaalia e lePulega o Malae Vaalele o le faagaioia mai o malaga a vaalele laiti mai lea nofoaga i le malae vaalele faavaomalo i Faleolo o le a tele ai le avanoa o le vaega autu poo le main terminal e faaaoga i malaga a vaalele tetele.
O le Aso Sa a sau nei e amata ai faigā malaga a vaalele laiti o le kamupani vaalele o le Samoa Airways mai le nofoaga fou i Faleolo, ae o isi malaga uma a lea kamupani vaalele o loo faaaoga ai i aso o le vaiaso le malae vaalele i Fagalii.
