O le faagasolo ai o tapenaga a le Malo ma le atunuu i le taligamalo tele o le fono a taitai o Malo e 54 o le Taupulega a Peretania o le a usuia ia Oketopa o le tausaga fou 2024 i Samoa, o se tasi o tapenaga tāua o nofoaga e faamautu ai usugafono ma isi tagata o le a malaga mai e mataitu taualumaga o lea fono a taitai o Malo o le lalolagi o loo i totonu o le li’o o Malo o le Taupulega.
Ua faailoa e le Ofisa Sili o pulega o tagata tafafao o se tasi o sui o le komiti o tapenaga o lea taligamalo e faapitoa i nofoaga e faamautu ai usugafono, le faletua o Pativaine Petaia Tevita, ua tatala le avanoa e le gata i faletalimalo, ae o aiga e iai o latou maota lelei e mafai ona faaaogā e tuuina atu ai ni a latou ofo poo Expression of Interest.
Ua avanoa ai foi ma ē o loo fausia ni faletalimalo poo ni maota mautu ae faamoemoe e mae’a fausia a o lei oo i le taimi o lea fono faavaomalo, e tuuina atu ai ma a latou ofo.
O i latou e agavaa i lea auaunaga o faletalimalo ma aiga o loo i le lio o le taulaga e tu lalata i le nofoaga autu o le a faagasolo ai le faatasiga a taitai o Malo o le Taupulega.
Ua fuafua e le Malo i le tala autu fou o le Tupe se vaegatupe e 20 miliona tala mo tapenaga o lea taligamalo o se taimi muamua ua faia mai ai i se atunuu laititi o le Pasefika.
O le aso 16 o le masina nei o Iuni e faamuta ai le avanoa e tuuina atu ai ofo i le komiti o nofoaga e faamautu iai usugafono mo lea fonotaga tāua.
