Ua tatala aloaia nei se tasi o polokalame faaleaoaoga ua ta’ua o le Postgraduate Certificate in Executive Leadership Program 2024.

O le Tamaitai Palemia, Afioga Fiame Naomi Mata’afa ma le alii Hai Komesina o Ausetalia i Samoa ia Will Robinson na la tatalaina aloaia lea polokalame fou i lalo o le faigapaaga o malo e lua (Samoa-Australia Partnership). 

O le atina’e o tulaga faaletaitai poo le Leadership Development o se tasi lea o fuafuaga o le Komisi o Tagata Faigaluega a le Malo (PSC) i ana galuega faatino.

E oo atu le 50 avanoa faasikolasipi mo lea polokalame e faatautaia i le Iunivesite o Samoa i Le Papaigalagala mai galuega fai faatasi a le Tautai Facility e tauala mai le DFAT ma le Komisi o Tagata Faigaluega a le Malo.

I le faatulagana o lea polokalame, mo ē o le a tauaveina mataupu o le a mafai ona faatino mataupu i lea taimi ma lea taimi (part time basis) mo kuata e lua.

O lenei polokalame e aofia ai mataupu tau i Fuafuaga & Amiotonu Ta’ita’i, Ta’ita’i & Puleaina, Talitonuina, Pulega ma Faiga Faavae a le Malo (Strategic & Ethical Leadership, Leading & Managing, Accountability, Governance and Public Policy) 

Faamauina o le 50 o avanoa faasikolasipi na tuuina atu i sui o Matagaluega ma Faalapotopotoga eseese o le malo, ma le 10 o ia avanoa na mafai ona faamanuiaina ai sui o le Faalapotopotoga mo Pisinisi Tuma’oti i Samoa (Samoa Chamber of Commerce and Industry) ma le faalapotopotoga o le Samoa Umbrella for Non-Governmental Organisations (SUNGO).

E oo atu i le $120,000 tālā Samoa le faatupeina o lea polokalame tāua.  

O se tasi lea o polokalame faasolo a le Komisi o Tagata Faigaluega (PSC) e faalauaiteleina ai le tomai o tagata faigaluega aemaise i ē o loo avea ma taitai o matagaluega taitasi.

Na faamanino foi o loo tutusa foi lea fuafuaga ma Taiala mo le Lumanai Manuia o Samoa 2022-2026.