E na o le tasi lava le ‘ai na manumalo ai Niu Sila ia Farani i le taaloga finau a le taamilosaga Under 20 i le lakapi, poo i latou ei lalo o le ta’i 20 tausaga le matutua lea o loo faagasolo i Aferika i Saute, le World Under 20 Championships.

O loo faagasolo Pool Games ma o le isi a latou fetauiga lea ma Farani na toe se’i ai e Niu Sila le malo ina ua faamaonia e le TMO na ova le kiki a le alii o Rico Simpson ma sili ai loa Niu Sila 27-26 a Farani a ua uma ma le taimi o le taaloga.

O le Baby Blacks la e pei ona faaigoa ai foi e nisi ua lua a latou malo i le pulu o loo iai, na malo ai ia Wales i ‘ai e 41-34, toe tasi le pool game o totoe e taaalo ai ma Spain i le Aso Lulu o le vaiaso fou.

O le taamilosaga muamua lea a le Under 20 ua aofia ai ma tulafono fou faavaomalo ua faia iai suiga ma pasia i se taimi e lei mamao atu ma e 12 ‘au o loo tausinio ai i pulu e 3 ua vaevae iai le taamilosaga.

Faato’ā faamae’a i le aso 19 o le masina nei.

O le Under 20 a Samoa i le taamilosaga o le World Trophy lea o loo faatulaga ai i le Pulu A ma Sikotilani, Iapani ma Hong Kong China ma o loo faaauau le taamilosaga ae na faia’ina Samoa ia Sikotilani i lana taaloga muamua 123-15.

O le isi taaloga e sosoo ai a Samoa o le a fetaui ai ma Iapani i le aso 8 o le masina nei.

Puna o Faamatalaga: https://www.1news.co.nz/2024/07/05/last-gasp-penalty-secures-nz-win-over-france-at-under-20-champs