Ua silia nei i le lua vaiaso talu mai le aso 16 o Tesema o le tausaga na tea nei, o taofia i se tulaga lē tumau nisi o auaunaga a le matagaluega o le soifua maloloina, i le fuafuaga e faato’ā toe faaauau pe a toe amatalia galuega a le Malo mo lenei tausaga fou 2023.
O ia auaunaga ua taofia lē tumau e aofia ai le vaaia o gasegase o fofoga poo mata, gasegase o taliga, le faia o taotoga, aiga fuafuaina, tuipuipui, falemai o ponaivi, ma nisi o gasegase e pei o le suka.
E le o taofia le auaunaga faalesoifua maloloina i ni gasegase ua tigaina, ma i latou ua aafia oloa poo nifo aemaise o gasegase tausāvali e fia maua se fomai ona o ni auga ua aafia ai.
O le tasi lea o tautua o loo manaomia tele fomai ma tausi soifua ona o tulaga i le faaitiitia o ē e iai poto aoaoina mo le faia o lea galuega, ma o se luitau tele lea i soo se faigamalo e tulai mai.
Ma o le tasi foi lea o faamuamua o le tapu’e o lea auaunaga ina ia lelei ma siitia i se tulaga e mafai ai ona tali atu i manaoga o tagata lautele e aafia i gasegase o le tino ma togafitiga ona o faalavelave tutupu faafuasei.
