A o māta’itūina pea e le ofisa o le vaaitau tulaga o iai le tau, o lea ua lipotia mai le tapunia ai o auala poo highway i faaitu o North Island, talu ai le mata’utia tele o uila ma faititili ua aafia ai le tele o nofoaga ma auala.
I lipoti mai le 1News, e lata lelei i le 18,000 uila na emo na faamauina e le vaega o le vaaitau i totonu o le na o le 19 itula, ma ua molimauina ai le tula’i mai o lōlōga ma eleele solo, ua tapunia ai auala i le State Highway 2 i Gisborne.
Ta’ua e le MetService o le tele o uila na emo na māua i Taranaki ma Waikato, ma faititili ma timuga tetele na faalogoina ma molimauina i Northland faasolo atu i Manawatū.
O loo māua o nisi o vaega i SH2 i le va o Ōpōtiki ma Gisborne, e aofia ai ma le Waioeka Gorge o loo tapunia pea a o faasolo ai galuega a sui o le tineimū ma faalavelave faafuase’i e aveese ma faamāmā atu le auala mai ni laau ma ni otaota o loo punitia ai luga o auala.
Ae o loo faamauina le aga’i atu o leoleo e fesoasoani i ni tagata ua lipotia atu le poloka i totonu o a latou taavale, e lē o mafai ona aga’i ese mai fafo ona o le tetele o tafega ma lōlōga.
E ui ua lipotia mai le faaitiitia o tulaga o iai aafiaga, ma fautuaga i nisi o faaitu, ae o loo faatumauina pea le fautuaina o tagata ina ia māta’itūina pea tulaga loulouā o le tau ma ia ‘alo ese mai le aga’i i auala o loo lolovaia ma ia vaai lelei laau pa’ūū mai le aafia ai o se tasi aemaise o laina eletise.
