O Fiti, Ausetalia, le malo o Amerika faapea le UK ua tapunia nei soo se faigamalaga mai ia atunuu faamoemoe e ulufale i le atunuu. 

Na faamaonia mai lea tulaga i se pepa o faamatalaga mai le Matagaluega o le Soifua Maloloina i le po anapo. Ua faamanino mai foi e lea ripoti o loo taofia pea soo se tagata e malaga atu i Samoa sa uia atunuu e pei o Aferika i Saute, Botswana, Eswantini, Lesotho, Malawi, Mozambique, Namibia, Seychelles and Zimbabwe. Lea ua aofia ai ma Fiti, Austalia, Amerika ma le UK ua lē mafai ona ulufale se tasi i Samoa. 

Na faamanino foi e le Matagaluega mo soo se tagata e fuafua e malaga atu i Samoa e matua’i tagatagai lelei i pepa malaga ma vaega e tatau ona uia ma faamaumauga e tatau ona faatino, afai ae faamalieina aiaiga uma ona faatoa mafai lea ona maua le avanoa e ulufale ai i le atunuu. 

O nisi o vaega masani o aiaiga ua toe faamalosia, o le talosagaina lea o tagata e fia malaga i Samoa ina ia faafesootai sa’o lava le Vaega o le Soifua Maloloina, 21 aso ae le’i oo i le aso e malaga ai, e le gata i lea e tatau ona faafesootai le Ofisa Sili o le Va i Fafo poo le Taitaifono o le Komiti a le Disaster Advisory poo soo se Ofisa Samoa’s Mission i atunuu i fafo e resitala ai mo se malaga.