Ua faasā e le malo o Peretania le app lauiloa a Saina, le TikTok ona toe faaaoga i luga o telefoni feaveai a tagata faigaluega a le malo ona o itu tau puipuiga.
O se suiga na faailoa mai lava ananafi ma aloaia ai lava i lea taimi ma e le gata i le aufaigaluega a le malo ae faapea minisita uma o le Kapeneta.
Ua faia ai e Peretania i le mae’a faia ai foi e Amerika o le faaiuga lava lea e tasi i le masina talu ai, ae o le iuni a Europa ma Belgium o loo faasā mo se taimi le tumau.
E le o aafia ai telefoni feaveai o le meatotino a le tagata faigaluega a le malo, ae na o telefoni ua ta’ua o meatotino a le malo.
O se faaiuga ua sau ai a o iai pea le popolega o le toatele o atunuu o lea e faaaoga e Saina lana TikTok e gaoia ai faamatalaga.
