O le a lē faia e leoleo ni moliaga o le tamaitai 24 tausaga le matua lea na faia iai se suesuega, e mafua ina ua mafai ona malaga ese ma le atunuu i se malaga mai le malaevaalele faavaomalo i Faleolo mo le atunuu o Fiti i le vaiaso o le Kerisimasi o le tausaga na tea nei, ae o lea tamaitai e leai ni ona pepa malaga e mafai ai ona tuua Samoa.
O le mataupu lenei na oo i le fono a le Komiti o le puipuiga malu o le saogalemu o le atunuu poo le Samoa National Security Committee, ma faia ai se faaiuga e tatau ona toe silasila i Tulafono o le puipuiga o tuaoi o Samoa ina ia aofia ai ma malaevaalele, ona o le saunoaga a le Komesina o Leoleo o se sui o lea komiti, o le Tulafono o loo iai nei e na o uafu e taunuu iai vaa o le sami o loo aiaia i lea Tulafono.
O le toe teuteuina foi o lea Tulafono o se itu tāua ona o loo tapena le taligamalo a le atunuu i le fono a taitai o Malo o le Taupulega e faia i le tausaga fou ma e tāua ai tele ona malu le puipuiga o tuaoi o le atunuu aemaise i lo tatou malaevaalele faavaomalo.
