Ua mae’a ona faataoto e le afioaga o Afega le tuaoi o latou eleele e pei ona sa iai se galuega i ni vaiaso ua tuanai, e tusa ai o le poloaiga a le Faamasinoga o Fanua ma Suafa na talia ai le talosaga a le nuu ua fia faataoto le tuaoi o latou eleele e pei ona iai le faaiuga a le Faamasinoga o Fanua ma Suafa o le tausaga e 1963.
Peitai o lea galuega ua mafua ai se tapenaga a alii ma faipule o Levi ma Alamutu i Saleimoa o le a faaulu i le faamasinoga se latou talosaga e saili ai le pule o ia eleele faaleaganuu.
Na faaalia e se matai o le sui o alii ma faipule o Levi ma Alamutu le susuga Umuiletainafiletuamasaga Pati Muaau, o le aso 3 o Novema na faaulu ai le talosaga apili a lo latou nuu e toe suesue ai le faaiuga a le faamasinoga na fofogaina ia Setema ma ave ai loa ma le talosaga mo se avanoa mai le faamasinoga e suesue ai le latou finauga i le pule o ia fanua.
Ua tapena foi se talosaga a nei afioaga e finauina i le faamasinoga maualuga faasino ia latou meatotō ua afaina i le galuega na suatia ai le eleele ma faataoto le tuaoi.
Ua faaulu foi se latou tagi i leoleo faasaga i ni matai o Afega e aofia ai le faipule aemaise o loo tuuaia ai foi ma leoleo.
Le sui o alii ma faipule o Levi ma Alamutu i Saleimoa le susuga Umuiletainafiletuamasaga Pati Muaau, i le feiloaiga ma tusitala ina ua mae’a le latou fono.
