O le vaeluaga o le po nanei ua faaiugafonoina e le Kapeneta i lalo o fautuaga a le Komiti o Faalavelave Faafuasei o le a agai ai loa Samoa i le laasaga 2 poo le Level 2 i tulaga o puipuiga mai le pepesi o le faama’i Koviti-19.
O lea suiga na faalauiloa e le Tamaitai Palemia afioga Fiame Naomi Mataafa i le afiafi ananafi ma faamanino ai nisi o tulaga poo aiaiga o le a iai le atunuu i le laasaga 2.
E pei ona silafia ua galulue lava le Matagaluega o le Soifua Maloloina, o le Mālō ma le Komiti o Faalavelave Faafuasei i auala e mafai ai ona puipuia mai pea le atunuu ma faamasani i tulaga ua iai nei o le feola faatasi ma le faama’i.
O suiga mo le laasaga 2;
– Itula e tatala ai pisinisi ma faleoloa, Aso Gafua i le Aso Toanai 6am – 2pm
– Faaauau pea ona tapunia auaunaga i le Aso Sa e pei ona iai i le taimi nei
– Tatala sauniga lotu i le na’o le 30 tagata
– Potopotoga mo maliu i le na’o le 30 tagata
– Isi potopotoga i le na’o le 15 tagata
– Tatala malaga i le va o Upolu ma Savaii Aso Gafua i le Aso Toanai
– Tapunia pea aoga
– Tapu le faatauina o le ‘ava malosi
O le see atu ai o Samoa i le laasaga lona lua i le po nanei o le a tumau ai mo le 2 vaiaso ona toe iloilo foi lea e le Komiti ma le Kapeneta i sana faaiuga faai’u pe faaauau pe suia loa i le isi laasaga.
