O atugaluga ma popolega o nisi o mātua i le faaaogā o fesoota’iga tau satelite e maua ai faamatalaga i su’esu’ega o mataupu mo le a’oa’oina o fanau a le atunuu, ona o le a maua ai ma faamatalaga ma ata e lē tatau ona tilotilo iai le fanau.
O se finagalo o le ta’ita’i o le Itu agai talu ai nei sa ia tuua’ia ai le faigamalo i le toe aumai o satelite ua toe foi ai i tua fesoota’iga i le atunuu ae ua iai laina poo cable i lalo o le sami. Sa ia tuua’ia foi fesoota’iga satelite e maua ai le initaneti i le maua ai e fanau ma ata lē manuia. Peitai o le finagalo o le Minisita o A’oga Taaloga ma Aganuu faapea le tamaitai Pule Faatonu poo le Regulator ua tali ai atugaluga o nisi o mātua e mafua i vaega na laga e le ta’ita’i o le Itu agai.
Ua faailoa foi e le tamaitai Pule Faatonu le afioga Gisa Fuata’i Purcell ma le Minisita o A’oga le afioga Seuula Ioane, o le fuafuaga a le Malo e faaaogā satelite e maua ai le initaneti mo a’oa’oga a le fanau, e mo na o fanau i aoga maualuluga ma le Iunivesite a le atunuu.
E gata le faaaogāina o lea fesoota’iga i totonu o a’oga ae lē maua i laoa ma maota o aiga o fanau seia vagana fesoota’iga faapea o loo maua i taimi uma mai auaunaga a kamupani telefoni feavea’i. Ua faamamafa mai e le Pule Faatonu e lē mafai ona maua e fanau ata ma faamatalaga lē manuia o loo atugalu iai nisi o mātua ona ua iai tapenaga e faamamā pe filter ai, ina ia lē mafai ona maua e fanau i le taimi e faia ai a’oa’oga i fesoota’iga tau satelite. E 3 vaega o loo faagasolo ai lenei polokalame a le Malo e pei ona faailoa e le Minisita.
