I lipoti mai le ofisa o polokalame tau le siosiomaga a le Pasefika le S.P.R.E.P. o le fonotaga lona tolu o le a usuia i Kenya i le masina fou e faaauau ai nisi o mataupu o loo feagai ma atunuu o le lalolagi i otaota poo lapisi o loo faaleagaina ai le siosiomaga.
O le feiloai ai o sui o le Pasefika i Palau i le vaiaso nei e tapena ai mataupu e faaleo i lenei fonotaga.
Saunoa le Minisita o le Siosiomaga a Palau, Steven Victor e ao ina saunia lelei mataupu a le Pasefika mo lenei faamoemoe.
“E ao ina o tatou omai faatasi ma mautinoa lelei ia lagona lo tatou leo i totonu o lenei fonotaga auā so tatou sao i faamoemoega o lenei fonotaga.
“Ia tatou taumafai e taofia loa lenei faafitauli e aofia ai ma le siosiomaga o le gataifale.
“Ae mo le ausia o lenei tulaga, e moomia vaega uma e faatino ma gaioiga uma.”
I faamaumauga o le gaosia ai o le uga poo plastics i le lalolagi sa 1.5 miliona lona mamafa i le tausaga e 1950 ae ua siitia nei i le 275 miliona mai le tausaga e 2010 ona toe siitia lea i le 359 miliona i le 2018.
E tusa ma le 8 miliona le mamafa o lapisi uga o loo agai mai ogasami o le Pasefika i tausaga taitasi ma o se popolega tele lea e pei ona iai le Pasefika.
O le komiti lenei poo le I.N.C. sa faavaeina i le fonotaga lona lima a le Siosiomaga a Malo Aufaatasi i le 2022 lea na talia ai e le 190 o Malo o atunuu le fofo o lenei mataupu e fausia ai se taiala e taofia ai le lapisi uga mo le siosiomaga o le gataifale.
O lenei taiala o loo ogatasi lea ma le faiga faavae a le Pasefika i le puipuia ma le taofia o le faalapisi o loo fai ma popolega tele i taitai o Malo o le Pasefika i vaega nei o le siosiomaga ma ona atinae.
