Ua tapena le aumalaga a le malo o Samoa e auai i le faaulufaleina o le maota fono fou o le fono faitulafono a le faigāmalo a Amerika Samoa e pei ona fuafua mo le vaiaso nei.
O se aumalaga e aofia ai le afioga i le Ao o le Malo ma lana Masiofo, o le Fofoga Fetalai o le Palemene ma le ta’ita’i o le malo i le Palemia.
O se tasi o tapenaga ua fuafua e faatino e pei ona faailoa e le Palemia, susuga Laaulialemalietoa Leuatea Polataivao Fosi Schmidt, o le taalolo o se tasi o tu ma aganuu a Samoa e masani ona vaaia i sauniga tetele e faaulufale ai malumalu ma isi galuega tetele o maota tāua.
O se ulua’i taimi lea ua masii ai le malo o Samoa e ala i se valaau faaaloalo a le malo o Amerika Samoa i le tatalaina o se maota fono fou o le fono faitulafono a Tutuila ma Manu’a.
