O le pine auro ai o le ‘aulakapi pa’i a Samoa mo le taimi muamua i taaloga a le Pasefika i le tausaga na te’a nei, o se faailoga lelei lea i le siitia o lea taaloga i lo tatou atunuu.
O le autū foi lea o tapenaga a le kalapu taalo a le Malisi Sagato Iosefo i lana taamilosaga lona valu mo lenei tausaga o le a faagasolo i le Aso Faraile ma le Aso Toonai o le vaiaso nei.
O se taamilosaga pa’i o le a puipui ai e ‘au na siamupini i le tausaga ua mavae o latou tulaga manumalo.
O ‘au ia o le Meitaki i le vaega o alii le Men’s Open, le ‘au a le No Idea i le vaega o tamaitai le Women’s Open, ma le ‘au o le Stay Aloof Ie ‘au fefiloi poo Mixed Open.
O ‘au fou ua lesitala mo lea taamilosaga o le Magic 7 ma le Tanoa Hotel i le vaega o alii, ma le ‘au a Tafitoala i le vaega fefiloi ma le ‘au a le Mana Brothers.
Faaalia e le Pelesetene o le asosi lakapi pa’i a Samoa, o le agaga faafetai i le taamilosaga lenei a le kalapu taaalo a le Malisi i tausaga uma, ona o se avanoa e una’ia ai pea le tulaga lelei o le taaloga ma siitia ai pea lona atina’eina mo alo ma fanau a le atunuu o loo fiafia i le taaloga o le lakapi pa’i poo le touch rugby.
