O loo faagasolo pea nisi o polokalame ma fuafuaga a aiga o le tatou atunuu i faatasiga poo reunion, faapea faafotu tupu ma faafotu o le vaaulu i le faaeeina o suafa matai i suli ma feoi o aiga, aemaise ua avea aso malolo o le faaiuga o lena tausaga ma le amataga o lenei tausaga fou ua malaga mai ai suli o aiga o aumau ma faamautu i atunuu i fafo.

O se avanoa lelei ma tāua auā ua matuā faatāua e le faamasinoga le tatau ona auai o le tagata e ave iai se suafa matai i le aso o le faiga saofa’i, ona ua tapu e le tulafono le toe taumafa e se suli i Samoa o le ‘ava o le suafa matai o se suli i fafo poo Samoa foi ua lē mafai ona auai i le faia o saofa’i.

O se tasi o faafotu tupu maualuga o le a amata ai lenei tausaga fou 2024, o le faafotu tupu i le suafa Matai’a o le afioaga ma le Foaiala o Vaitele i le itumalo o Faleata.

O lea faanofonofo o le a faaee ai le suafa Matai’a i le tamaitai le afioga Galumalemana Margret Faleao Maka Sapolu Leota Laki Sio, o ia ua fulisia iai le lagolago a suli o Uilaefa o le suafa Matai’a o Vaitele i Faleata.

O Setema o le tausaga na tea nei 2023 na tuumalo ai le susuga Matai’a Lynn Netzler sa tausia le aiga i suli o Uilaefa, ma toe faia ai le filifiliga a le aiga potopoto.

O le faafotu tupu o le a faia i le Aso Faraile muamua o le masina amata o lenei tausaga fou, lea ua faamoemoe e usu ai le itumalo o Faleata aemaise o le a tumutumu ai foi malo usu mai itu e fia o le atunuu.