E ui ile tele o faafitauli oloo feagai ma le asosi triathlon a le atunuu eleo gata ai le saili malosi o alo ma fanau oloo taumafai i nisi o taamilosaga aua tapenaga mo taaloga ale Pasefika i le masina o Novema.

E pei ona faailoa i ripoti mai ale asosi o se laasaga fou e mautinoa ai le atinae o lenei taaloga ile atunuu.

E pei ona silafia ua faailoa faalauaitele ele asosi i luga o upega tafailagi le maea resitalaina ile Matagaluega o Pisinisi Alamanuia ma Leipa le faalapotopotoga o lenei taaloga ua taua ai ole Tri Sports Samoa.

Faalia ele Peresitene Arthur Mulitalo o se isi laasaga fou lea mo le asosi e ala i le tuuina atu o lana au e tauva i taamilosaga faavaomalo.

“Ole malaga atu ale au ale triathlon i lenei faamoemoe i Fiti o se vaega tele lea mo latou e siitia ai le tulaga ile malosi ao metotia e fetuutuunai ai le mafaufau i tauvaga olea feagai ai.”

“Oloo iai le Susuga ia Darren Young ua loa i taaloga faapenei ae peitai oleisi vaega ole taimi muamua lenei olea tauva ai i isi atunuu.”

E 12 le au atoa olea feagai ma taaloga i Fiti toavalu o alii male toafa o tamaitai ma na filifilia mai ile amataga o lenei tausaga ma faia toleniga i lalo ole taitaiga ale Faiaoga ia Bernie Poot o se tasi o faiaoga iloga i lenei taaloga ile lalolagi.

O vaega uma olenei taaloga oloo mulimuli ai Fiti i le faatinoina o vaega uma ole triathlon na faailoa ai e le Taitai ole Au Lani Wendt Young loo agai lea i vaega ua maea faataatitia i le atu Solomona mo taaloga ole Pasefika.

“E manatua foi o tuuga aau ua masani ai lava matou e faatino ile sami ae peitai ua matou maua le tala mai le atu Solomona olea faaoga pools e faia ai le vaega lea ole triathlon.”

“Ole ala lena na matou agai vave ai faatino toleniga aau ile fale aau i Tuanaimato ina ia taumafai ona faamasani ai le au.”

“Ona olea faaoga le poo o tuuga uma lava olea faia ile vevela ole la olona uiga e manaomia le aau, vili le uila ma tamoe ile tele o taimi e ao ai ona saoasaoa le gaioi.”

 O le taamilosaga i Fiti sa tagi lava i lima lona faatupeina e pei ona iai nisi o suega seleni sa faatino ele asosi.

“E momoli ai foi faafetai lava iai latou sa fesoasoani mai lenei asosi ma ana taumafaiga matou tele mafaia lava se mea tasi pea aunoa male lagolago a si o tatou atunuu aemaise lava i aiga ma uo.”