Ua toe tapena auaunaga uma i le atunuu o loo lotolotoi i le atiina a’e o tagata tafafao, e faataoto alāfua ma le auivi o fuafuaga e tali atu ai i le toe tatala o tuaoi faavaomalo o Samoa i le masina o Aokuso, ma toe faafeiloai tulisi tafafao mai fafo, aemaise o tatou lava tagata o le a toe tafafao mai i le atunuu ma fai mālōlōga ma faaaogā ai, faletalimalo ma isi tautua uma e fesoota’i i le atiina a’e o tagata tafafao.

I le lua masina o lumanai ai ona toe tatala lea o malaga faavaomalo masani, ae o le fono a sui uma o pisinisi o loo tautuaina tagata tafafao i le faaiuga o le vaiaso na te’a nei, na folasia ai lagona atuatuvale o nisi o le au fai faletalimalo ona e lē o taoto mai i se tulaga mautu se tapenaga a le pulega o tagata tafafao i le toe tatala o tuaoi faavaomalo, e faasino lea i aiaiga o puipuiga o le faama’i mo tagata tafafao mai fafo, i le fesili pe faanofoesea pea e pei ona aiaia le fitu aso mo lea tulaga, pe o le a taunuu loa tatala tulisi e pei ona sa masani ai.

O le isi tulaga sa faaleo ai ni lagona o sui na auai i le faatasiga po ua taoto se fuafuaga a le Malo ma le pulega o tagata tafafao i se faiga e faapau ai pasese o vaalele, ae o a foi ni kamupani vaalele e mafai ona malaga ai i Samoa e ese mai le Air New Zealand ma le Fiji Airways ma le kamupani vaalele a Ausetalia le Quantas lea o loo iai ana malaga mai i Samoa i le taimi nei mo le aveina o tagata faigaluega faavaitaimi. Sa faatalanoa le peresetene o le asosi o faletalimalo ma tapa sona finagalo i tapenaga i le isi lua masina o muamua nei a o lei toe tatalaina tuaoi faavaomalo o Samoa. 

Se faatalanoaga ma le Pelesetene o le asosi o faletalimalo i le atunuu susuga Tupai Saleimoa Vaai. Ua faailoa e le pulega o tagata tafafao i le faatasiga a sui o le atina’e o tagata tafafao, ua faamautu le toe faia o malaga a le isi kamupani vaalele o le Virgin Australia mo malaga i le va ma Samoa. Ua faailoa foi i lea faatasiga le ono lele mai foi i Samoa o le isi kamupani vaalele le Jet Star i se faiga paaga ma le kamupani vaalele o le Quantas a Ausetalia.

O le kamupani vaalele a Fiti ua fuafua se isi ana malaga e afea ai Samoa ma malaga agai i Honolulu i le setete o Hawaii pe a oo ina toe tatala malaga masani.