Ua taofia nei e leoleo se alii e 30 tausaga le matua i tuua’iga o le taufaamata’u e ala i se agaese ma lona ū ai o se malu o le malo a o taumafai atu leoleo e pu’e faapagota i le faaitu o Dunedin.
Faamauina i lipoti mai le leitio faavaomalo a Niu Sila, na maua atu e leoleo lenei alii e 30 tausaga le matua i se tuātusi i le faaitu o King Edward Street poo le itula e 10 i le taeao o le vaiaso talu ai, ina ua oo atu ni valaau i le ofisa, o loo ia taumafai e ave faamalosi pe gaoi ni taavale.
I lipoti, na ta’ua ai ina ua faailoa atu e malu o le malo o le taofia faapagota o ia, o i lea na faalālā a’e ai loa e lea alii se naifi, a o le’i pa’ū i lalo ma taumafai atu loa malu o le malo e saisai ma taofi o ia.
I le taumafai o se tasi o leoleo e taofi le alii o loo aafia, o inā lea na māua ai loa le ū ai e lea alii o sia malu o le malo.
Na avatu lea tagata e leoleo i le falema’i mo iloiloga.
Faamauina le tele o moliaga o loo molia ai lenei alii e 30 tausaga le matua, e aofia ai lona ave faasolitulafonoina o se taavale, umiaina o se ‘au’upega mata’utia, o lona tetee atu i le taofia ai o ia e leoleo ma le faaoo manu’a ma le loto iai.
O le a tula’i o ia i luma o le Faamasinoga Faaitumalo i le Aso Lulu.
Puna o Faamatalaga: https://www.rnz.co.nz/news/national/582530/man-allegedly-bites-officer-during-arrest-threatens-police-with-knife
