Ua taofia le tumau e Aferika I Saute le isi tui puipui o le Koviti lea ua maea saini ai Niu Sila e sau ai le isi faitau miliona o ana tui o le Koviti
O le faaiuga lea ua faia e Aferika I Saute ona o le popolega e le mafai e vailaau o le tui e sau mai le Oxford-AstraZeneca ona tetee atu pe puipuia ai tagata mai le vairusi fou lea ua sau nei mai Aferika I Saute
O le vairusi lenei na muai maua I Aferika I Saute I le ogatotonu o Novema o le tausaga ua te’a, ma o lea foi ua faamaonia ua aumai e pasese o loo faimalaga mai I totonu o Niu Sila
O le vaiaso talu ai na taunuu ai le uta muamua o le 1 miliona o tui a le AstraZeneca I Aferika I Saute, ma I ripoti ua toe suia nei I vailaau a le Johnson & Johnson faapea le Pfizer e faia ai tuiga o tagata faigaluega I le vaega o le soifua maloloina lea e amata faia I le masina nei
O le sau o lea tala, ua fesiligia ai nei pe a faafefea Niu Sila ma lana maliega ua maea faia e aumai ai tui nei a le Oxford Astra-Zeneca
E 7.6 miliona tui a le Oxford-AstraZeneca ua maea sainia e Niu Sila I lalo o le maliega e aumai ai nei vailaau ese mai ai le Pfizer ma le BioNTech lea ua talia I lalo o aiaiga e sau ai le 1.5 miliona tui puipui Ae mai le sooupu a le Medsafe, e leai se tui e aofia ai ma le AstraZeneca e talia I totonu o Niu Sila e aunoa ma suesuega maumaututu a le Medsafe e faamautinoa ai le saogalemu mo tagata Kiwi
