O le Aso Faraile o le vaiaso na tea nei na fuafua e tuuina mai ai le faasalaga a lana afioga i le faamasino o Vui Clarence Nelson i le mataupu a le tamaitai sa galue muamua i le faletupe o le ANZ.

E $1.5 miliona tala na aveese faasolitulafono e Seira Malifa a o galue i le faletupe.

E lei faataunuuina le faasalaga a le faamasinoga talu ai e lei tali ane le loia a le itu tetee i le talosaga tusitusia a le itu a leoleo o loo fautuaina ai se faasalaga faafalepuipui mo le umi e 10 tausaga.

Peitai na saunoa le afioga ia Vui e mautinoa lava e falepuipui lea tamaitai pau le fesili o loo tulai mai poo le ā le umi.

Na poloaia e le faamasinoga le nofo taofia o lea tamaitai seia aulia le Aso Faraile o le vaiaso fou.

Na ioeina e lea tamaitai moliaga e 300 o le gaoi a o avea ma tagata faigaluega, lea e tusa ma le $1.5 miliona tala.

O lea mataupu na aliae mai i le tausaga e 2022.