Ua lē fesootai mai le pule o le Tatiana Investment o loo pulea le fale kalapu o le R.S.A. ina ua maua iai se fesootaiga, e pei ona sa tapa sona finagalo e tusa o se faaiuga a le komiti e pulea le ‘ava malosi, e taofi le toe faamatuuina iai o le laisene e faatau ai le ‘ava malosi, ae se’i tālia se faamatalaga mai le matagaluega o puna’oa faalenatura ma siosiomaga e faatatau i le lisi o le fanua o loo iai le fale kalapu.
Na faailoa mai e le susuga Amituanai Faleulu Mauli, e sese ia lipoti, ae o le a fesootai mai i le afiafi ananafi pe a uma lona pisi.
Peitai e tuuina atu lenei lipoti mo le faasalalauina e lei toe fesootai mai.
O le faaiuga o le vaiaso na tea nei na vaaia ai i luma o le falekalapu ni tape a le matagaluega o tiute ma tupe maua o loo iai le komiti faatonu e pulea le ‘ava malosi, o loo faapipii i le faitotoa o le fale kalapu ma tusia ai upu e lē mafai ona toe tatala.
O le masina o Iuni na faia ai le faaiuga a le komiti e pulea le ‘ava malosi e taofi le toe tuuina atu o le laisene ‘ava malosi mo lea pisinisi ona o loo iai se aafiaga o le lisi o le fanua i le va ma le matagaluega o puna’oa faalenatura ma siosiomaga.
