Ua iai nei le faai’uga a le Kapeneta e amata atu i le aso muamua o le masina fou o Tesema, o le a na o auaunaga faasalalau o loo faatupe e le malo e alu ai soo sana faasalalauga i matāupu eseese mo le silafia e le atunuu lautele.
E oo lava i faasalalauga faapisinisi a le malo o le a na o ana auaunaga faasalalau e ave iai, ma ua faamuta ai foi ma soo se faigāpaaga a soo se auaunaga a le malo ma ni tautua faasalalau i le vaega tuma’oti o loo faagaioia faapisinisi.
Ua lē gata i le na o itutino faasalalau a le malo e ave iai ia faasalalauga ma faamatalaga faalaua’itele ae ua faaalia foi i lea faai’uga e ao i soo se auaunaga a le malo ona faaaogā a latou auala o faasalalauga i luga o upega tafa’ilagi mo a latou faasalalauga.
O se faai’uga ua faia e le Kapeneta i se autū o le faasao ai o tupe alu ae ia mautinoa ia sa’o atoatoa faamatalaga mai le malo mo le silafia e le atunuu i Samoa ma atunuu i fafo.
O lea foi ua toe una’ia ai ma le faaaogāina o le nusipepa a le malo o le Savali e faia ana lomiga faasalalau i vaiaso ta’itasi e faailoa ai soo se matāupu tau i le malo.
