Ua taofia nei laisene mo nisi o pisinisi sa gaosia ituaiga o fagumalosi o le Vodka o loo faaigoa o le Rover, Sami, Boom, Rice, King, Niu Vodka ma isi, faapea foi ona taofia le gaosia ma le toe faatauina o le uaina o le Olioli ma le Talofa Plum Wine.

O le fono a le komiti e pulea le ‘avamalosi i le Aso Tofi ua mavae na faia ai lea faai’uga ina ua maua e le komiti ia latou sailiiliga o ia ituaiga o meainu malosi ma uaina ua lē ogatasi auala sa gaosia ai ma aiaiga o le Tulafono o ‘avamalosi. O le taofia lē tumau o le faatauina o isi ituaiga o meainu sui malosi e pei o le Moni ma le Sili o loo faaauau pea, ae ua toe tatala nei e le komiti o le ‘avamalosi e ta’ita’ifono ai le Minisita o le ofisa o le Tiute ma Tupe Maua, le faatauina o beer o le Vailima Export Larger poo le povi ma le beer o le Taula Strong.

E lē o faailoaina mai e le komiti i le pepa o faasalalauga faalaua’itele mafuaaga o le toe tatala o le faatauina o ia ituaiga e lua o ‘avamalosi o ni beer o loo gaosi e le kamupani gaosi beer o le Vailima ma le Taula.

Na taofia le faatauina o fagumalosi e pei ona faailoa atu ma isi beer faapea ma uaina o le Olioli ma le Talofa Plum Wine ona o su’esu’ega i le vailaau e ta’ua o le ethanol o loo sui ai ia meainu malosi e mafua i atugaluga i le maualuga tele o le pasene o lea vailaau o se sipili.