Search
Search
NUS Samoa
NUS Samoa

Taofi fesootaiga komepiuta o le Moodle mo fanau e silia i le 800 e lei totogia pili

O le Aso Lulu o le vaiaso nei na amata ai se faaiuga a le pulega o le tatou Iunivesite Aoao o Samoa o le faamuta lea ona toe tatala fesootaiga komepiuta o le Moodle i fanau a le atunuu e tusa ma le 838, e lei totogia lava o latou pili a’oga mo le semester muamua o lenei tausaga faaleaoaoga i totonu o le Iunivesite i le Papaigalagala.

O se faasilasilaga i luga o le itulau o upega tafailagi a le iunivesite, o loo faailoa ai lea faaiuga ma le tatalo a le pulega o le iunivesite aoao i mātua ia faatāua aoaoga a o latou alo ma fanau ma totogi o latou pili ina ia maua ai aoaoga o mataupu i fesootaiga tau komepiuta o se tasi lea o auala televave o loo maua ai e fanau aoaoga faaiunivesite.

O loo iai le avanoa e toe maua ai e fanau ua faaletonu aoaoga ona o pili, pe a saini e mātua se maliega ma le iunivesite e togitogi ai.

O le 838 o fanau e lei totogia pili o se numera toatele pe a fua i itumalo faapalota o le atunuu ua fesoasoani le poloketi tasi le miliona i le totogiina o pili o fanau o loo i totonu o iunivesite e lē gata o le Papaigalagala ae o le Iunivesite a le Pasefika o loo i Alafua.

O le Aso Gafua 15 o le masina nei o Aperila o loo aiaia a oo atu iai e lei sainia se maliega e totogi ai pili poo le leai foi o se vaega o le pili ua totogia, ua faailoa e le pulega o le iunivesite o le a faalēaogā loa lesitala ma aveese le igoa o le tama poo le teine aoga mai le lisi o fanau a le atunuu o loo aoaoina i le iunivesite mo le semester muamua o loo faagasolo aoaoga o mataupu i le taimi nei.

O le valuselau ma ona tupu o fanau ua faaletonu aoaoga ona o pili e iai le talitonuga o le ‘afa lea o le numera atoa o fanau sa lesitala mo le semester muamua o lenei tausaga faaleaoaoga.

Tala sili ona faitaulia

Tala mai samoa

TALA FOU MAI SAMOA

TALA MAI NIU SILA

SAMOA UPDATE

PODCASTS

Listen on

FAATALATALANOAGA

POLOKALAME A LEOLEO

Keep uptodate with Radio Samoa activity & promotion

* indicates required