Ua afea le atunuu mo le lua vaiaso e le tamaitai o Monica Taumate Galetti o se Samoa ae o loo faamautū nei i Peletania ma faagaioia ai lana pisinisi o se fale’aiga, ona o Monica e na te umia faailoga maualuluga i le tomai o le kuka, poo le tagata e matuā lelei lava i le saunia ma le gaseseina o soo se taumafa.

O ia ua avea nei ma amepasa a le pulega o tagata tafafao a Samoa i le faamoenoe na te faalauiloa le atunuu e ala i lona tomai.

Na soifua a’e i Samoa a o laitiiti ma malaga ai i Niu Sila ma ona mātua ma faamautū ai ae o le mae’a maua o nisi o ona faailoga i le kuka i Niu Sila na siitia ai i Peletania ma faaauau ai ana a’oa’oga i lea lava tomai ma nofo ai loa ma faatino lana pisinisi o se fale’aiga.

O lea la ua toe foi mai e fesoasoani ia i latou o iai lea tomai ma o loo galulue i faletalimalo ma fale’aiga i le atunuu.

O le a ia asia le a’oga maualuga a Ausetalia o loo i Vaivase lea o loo a’oa’oina ai matātā eseese e pei o le kuka.

O le a ia asia foi le a’oga tulagalua a Vaivase lea na ia faamatala o le a’oga lea na a’oga ai a o le’i malaga ma faamautū ma ona mātua i Niu Sila.

O Monica o lona tuaa tinā e mai le afio’aga o Sapapalii ae o lona tuaa tamā e mai afio’aga o Malie ma Leauvaa.

O le tausaga e 2004, na faaipoipo atu ai le tamaitai Samoa o Monica i se alii mai Falani, o David Galetti, o lea alii e faauluulu iai le aufaigaluega (waitress/waiters) i se tasi o fale’aiga iloga i Lonetona, Le Gavroche.

E to’atasi lo la alo teine na fanau i le tausaga e 2006.

Sa maua se avanoa e fesiligia ai le tamaitai i lona tomai ma le faamoemoe o loo malaga mai ai i lo tatou atunuu, aemaise o lea sa feiloa’i atu i le Minisita o Tagata Tafafao le afioga i le Palemia, Fiame Naomi Mataafa i le amataga o le vaiaso.

Le tamaitai kuka lauiloa o Samoa i Peletania o se faamasino i le polokalame kuka a le Televise a Peletania le BBC, le tamaitai o Monica Taumate Galetti.