Talosaga le Komisi o le faamasinoga e faaauau le tofiga ua maea ona faia

O le taofia ai e le Minisita o Faamasinoga o le filifiliga ua tofia ai le Sui Peresetene o le Faamasinoga o Fanua ma Suafa ua faaalia e se molimau faatuatuaina o lea ua ave le talosaga a le Komisi o Galuega a le Faamasinoga o Fanua ma Suafa i le tamaitai Minisita ia Matamua Vasati Sili Pulufana e faaauau le latou tōfiga ua maea ona faia e pei ona ripotia o le Aso 17 o le masina nei e faatautō ai le afioga ia Faimalomatumua Mathew Lemisio i le tofiga Sui Peresetene. 

O le tusi a le Minisita o loo ia faailoa atu ai ona atugaluga i le Ofisa Sili o le Matagaluega o le Faamasinoga faapea le Loia Sili a le malo ona e le’o iai se aiaiga i teuteuga fou o le faavae ua tuueseese ai le pulega o galuega a le Faamaisnoga Sili ma le Faamasinoga o Fanua ma Suafa faasino i le filifilia o Faamasino o lea Faamasinoga e aofia ai ma le tofiga Sui Peresetene. 

I se avanoa na fesiligia ai le tamaitai Minisita na ia faaalia ai ua faailoa atu e le Ofisa Sili o loo tapena le tulafono faatoa avanoa ai e faia sea filifiliga ma e lei oo i le tulafono tau faaofi i le palemene mo le pasiaina. 

Taua e Matamua “O la’u tusi sa ave i tai (Ofisa Faamasinoga)  sa CC kopi ai le AG, Attorney General o le tumutumuga lena e faalagolago ai le malo mai mea e tatau ona fai”. 

Na ia taua foi “ Pau la’u fautuaga na ave iai mo le agai i le lumanai e amata atu nei e tatau a ona faailoa mai uma mea o loo tutupu i tai, e mo’i o le Judiciary pei e mati’e foi le latou tulaga e iai foi taimi e lē aiāina ai e le Matagaluega, ae tatau lava ona o’u malamalama ma o’u iloa, faailoa mai, o le manaia o le nofo malamalama pe vevesi a’e i fea a’o lea ta te iloa ae ese le lē manaia o lea mea o le iloa mai i isi a’o lea ta te nofo”. 

O le Aso Tofi nei e feiloai ai le Minisita ma le Loia Sili e faasoa ai so lā finagalo i le mataupu lenei a’o taofia ai le faaauauina o tapenaga mo le faatautoina o le Sui Peresetene o Fanua ma Suafa ua tofia iai e le Komisi o Galuega a lea faamasinoga. O le taitaifono a le Komisi o Tagata Faigaluega a le malo o se faamasino o le Faamasinoga Sili e tōfia e le Faamasino Sili ma le Peresetene, o sui ia e toatolu o le Komisi o Galuega a le Faamasinoga o Fanua ma Suafa. 

Ua faaalia e le Minsita o le Matagaluega o Faamasinoga ma le faafoeina o mataupu tau faamasinoga o le ā ia tuu atu le mataupu lenei i luma o le Kapeneta  i le fono masani o lenei vaiaso. 

Share on facebook
Share on twitter
Share on email
Share on whatsapp
Scroll to Top

Keep uptodate with Radio Samoa activity & promotion

* indicates required