I lana lauga faataupou i le tauaofiaaga o le Palemene i le vaiaso nei na faaleo ai e le Sui Faipule mo le itumalo faapalota Safata No.2 nisi o manaoga o lona itumalo aemaise lava o se falemai faaitumalo.
Taua e le afioga Laumatiamanu Ringo Purcell e matuā telē le manaomiaga o se falemai faaitumalo mo tagata o loo nonofo i lona itumalo mai i latou e latalata ane ae faasilisili nai fanau laiti pe a manaomia vave togafitiga ma siaki.
Na ia faailoa foi o le falemai faaitumalo i Potasi e 22kilomita le mamao mai Safata ma o le falemai faaitumalo i Leulumoega e 27kilomita, e fai tele si mamao o nei falemai faaitumalo mai le itumalo Safata ma e manaomia se falemai mo lea lava itumalo.
E iai talitonuga a le sui faipule sa iai muamua se falemai faaitumalo i Safata peitai na tapunia ma e le’i toe faafoua pe toe fausia e le malo.
O lona naunautiaga ma o loo ave lana faamuamua i le ola maloloina o tagata o lona itumalo ma afioaga eseese o loo lata ane e vave manaomia fesoasoani i togafitiga i le falemai.
