Ua toe o le masina o Iulai ma ni vaiaso o loo totoe o le masina o Iuni o loo savalia ona toe tatala lea o tuaoi o Samoa mo faigamalaga masani. Ua molimauina ai nei le faasalalau o le talosaga aloaia a le kamupani vaalele a Ausetalia le Qantas e fia lele mai ona vaa i Samoa i le faamoemoe i ni malaga mai Sini ma Brisbane.

Afai ae talia le talosaga a le Qantas e pei ona tuuina atu i le Matagaluega o galuega tetele ma fela’ua’iga e iai ma vaalele sivili, o lona uiga o le a lua kamupani vaalele a Ausetalia o le a tautuaina malaga mai lea atunuu mo Samoa e pei ona iai ma le Virgin Australia lea ua faamautu mai e le pulega o tagata tafafao o le a toe faaauau foi ana malaga i le va ma Samoa.

E pei ona silafia o le fono talu ai nei a sui faipisinisi uma o le atina’e o tagata tafafao na faailoa ai e le pulega o tagata tafafao tapenaga o loo faia mo le faamautu o ni kamupani vaalele e malaga mai i Samoa ina ia mafai e tulisi mai fafo ona toe afea le atunuu pe a toe tatala malaga masani faavaomalo.