Ua tapena nei Alii ma Faipule o Levi Saleimoa e tuuina atu i le Faamasinoga Maualuga a le atunuu, se talosaga e finauina ai se poloa’iga lē tumau e taofia ai le malosi o le faai’uga a le Faamasinoga o Fanua ma Suafa, lea ua poloa’ina ai aiga e 47 o lea afioaga e tula’i ese i totonu o le 3 masina mai se vaega o eleele o le nuu o Afega o loo latou nofoia ma faaaogāina.

O le 3 masina na amata faamamalu i le aso 16 o le masina lenei o Me, o lona uiga e tatau ona mae’a i le ogatotonu o le masina o Aukuso.

O le feiloa’iga a tusitala ma le komiti a le afio’aga o Levi Saleimoa faapea sui o Alii ma Faipule na faailoa ai lea fuafuaga.

O le feiloa’feiga foi lea na faailoa ai le tasi o tapenaga ua faamoemoe ai e faaulu i le Faamasinoga Maualuga se talosaga e toe iloilo ai faai’uga uma a le Faamasinoga o Fanua ma Suafa e faasino i eleele sa faamasino ai le nuu ma le afio’aga o Afega e faatatau lava i eleele ua mafua ai le faai’uga na fofogaina i le tausaga e 1963, lea na saga faamalosia i le faai’uga a le faamasinoga i le masina o Me o le tausaga na te’a nei lea na faia ai ma le poloa’iga a le faamasinoga o talosaga toe iloilo a le Faamasinoga o Fanua ma Suafa e faatino loa e le nuu o Afega le galuega o le fuaina o le tuaoi o latou eleele. 

Le sui o le komiti o Alii ma Faipule o Levi Saleimoa le susuga Utuiletainafiletuamasaga.

O le feiloa’iga a sui o le komiti o le nuu ma tusitala na folasia ai foi nisi o tuua’iga faasaga lava i lenei faai’uga, ma o le a tuuina atu uma ia tuua’iga ma mau e lagolago ai i le talosaga o le a finauina ai se isi iloiloga o faai’uga ua mae’a, e le Faamasinoga Maualuga a le atunuu.

E lei faamautūina i le taimi nei se aso o lea finauga ona o loo faagasolo tapenaga i le va o le nuu ma latou loia.