E lei taunuu ona valaau le talosaga a le afioaga o Leauvaa i le lē usitaia e Afega o le poloaiga e taofi ai galuega o le fuaina o tuaoi o o latou fanua, ae ua taatia se’i suesue muamua le talosaga ua faaulu e le itu a le nuu o Afega ua finau ai e lē tatau ona seei le Faamasino Sili le afioga Satiu Simativa Perese i le suesueina o talosaga a Leauvaa o loo taoto e lei iloiloina, ona e iai mafuaaga.

Na faailoa e le tamaitai loia o loo tulai mo Leauvaa ia tulaga ona sa na o loia ma faamasino na auai i le valaauina o le mataupu lenei i le aoauli o le Aso Lua, ma o lea tauaofiaga e ta’ua o le In-chamber.

O le feiloaiga foi lea na faailoa ai le iai o se talosaga a Afega ua faaulu nei i le Faamasinoga o Talosaga poo le Faamasinoga Apili a le Faamasinoga Maualuga ua lu’i ai le faaiuga a le Faamasino Sili na talia ai le talosaga a Leauvaa i le faia o se poloaiga e taofia galuega a le nuu o Afega ae tālia se faaiuga o lu’i faaletulafono a Leauvaa ua faatūtū i teuteuga o le faavae ma le tulafono o Faamasinoga o Fanua ma Suafa na pasia e le Palemene i le tausaga e 2020.

O le 2 o le aoauli o le Aso Lulu a sau e valaau ai le talosaga a Afega ua tatalo ai e lē tatau ona seei le Faamasino Sili i le suesueina o talosaga a Leauvaa e lē gata o le tagi i le lē usitaia e Afega o le poloaiga, ae o finauga faaletulafono e faasino i teuteuga o le faavae.

O se faaiuga o lea talosaga e iloa ai le suia o se isi faamasino o le Faamasinoga Maualuga e tauaveina nei mataupu, poo le tumau pea ona seei ai le Faamasino Sili.