Masalomia o le tama na maua lona tino maliu i Mt Albert i Aukilani na fasiotia a o iai i savaliga o le afiafi.
O lea ua tatala su’esu’ega a leoleo i le maliu o le tama na maua lona tino maliu i le poo le Aso Lua 24 Me, 2022 o se tasi na faaoo iai e se isi le oti.
O le latalata i le 7 i le po lava lea na maua ai e se tasi le tino maliu o lea tama i Mt Albert, ma e lē o iai se talitonuga o leoleo a mea na aafia ai le faaaogā o se laau malosi pe fesoota’i foi ma vesiga a kegi o loo iai nei i Aukilani.
I lipoti ua tuuina mai o lē ua na maua lona tino maliu e faapea e nofo i Mt Albert ma o lea sa ui ane i le paka e agai i lona aiga, ma e maua e le’i leva ona maliu.
O loo faaauau pea su’esu’ega a leoleo, ma o loo fai ma asia e leoleo lea pitonuu a o valaau mai ai foi i tagata lautele e fesoota’i atu i le ofisa pe a silafia nisi faamatalaga poo iai foi ni ata mai le CCTV e fesoasoani i sailiiliga o loo faia nei.
O se lipoti lata mai o lenei faalavelave, ua faailoa ai e leoleo le ata ma le suafa o le alii ua masalomia i le faatinoga o lenei faalavelave, ma ua agai nei i ai su’esu’ega. O le alii o Christian Eteuati lea ua sailia nei e leoleo, o se alii ua 22 ona tausaga, ma o loo lapataia e leoleo le mamalu o le atunuu, ia aua ne’i o latou taumafai e faalatalata pe faafeiloai lenei alii, ae ia vave ona vili le 111, ona o lea ua .
E talitonu leoleo o le naifi na faaaogā i lenei osofa’iga mata’utia ma e leai se masaniga a si alii ua maliu ma le alii lea ua masalomia nei.
Faaalia e Detective Inspector Chris Barry, e lē o iai so latou silafia i se sootaga a le alii o Eteuati ma ni kegi, ma e lei faailoa foi pe iai ni faamaumauga o ni soligatulafono sa fai muamua a lenei alii.
Ua lapataia foi e leoleo le mamalu o le atunuu, ina ia lagolagosua i le galuega a leoleo o loo fai, ae o se solitulafono pe afai o loo taumafai se tasi e faalafi lenei alii.
Soo se tasi e maua ai ni faamatalaga e fesoasoani i leoleo i le latou suesuega o loo faagasolo, e talosagaina le vili o le 105 ma ta’u atu le numera o le faila o lenei mataupu 220524/8192. E mafai foi ona ta’u atu e se tasi ni faamatalaga e aunoa ma le faailoa o lona suafa pe a vili le Crime Stoppers i le 0800 555 111.
