O le lipoti a le faletupe o atina’e a Asia le Asian Development Bank ua faalauiloa i le vaiaso nei ua faaataata mai ai se siitaga e 4.7 pasene i tamaoaiga o le itulagi o le Pasefika i le tausaga nei ma le faasolo pea ina siitia o ia pasene i le aga’i atu i le tausaga fou.
O le toe foi o auaunaga tau tulisi a le Pasefika i le tulaga sa masani ai a o le’i oo mai le faama’i atoa ai ma le toe tatalaina o tuaoi faavaomalo o le tele o atunuu o nisi ia o mafuaaga o le tulaga lelei e pei ona mātauina i le lipoti lea a le faletupe o Asia.
Fai mai i latou sa feagai ma le tuufaatasia o le lipoti o se tulaga lelei tele ua toe mātauina nei i le Pasefika ae o loo vaavaai foi ma le toto’a i nisi o tulaga tau le tamaoaiga a o aga’i atu i le lumanai.
O le lipoti a le RNZ Pacific ua faailoa ai o le faletalimalo o le Taumeasina Island Resort i Samoa o loo tausinio i faailoga taualoa faavaomalo mo le tausaga lenei, le 2022 International Travel Awards. O ia faailoga e amana’ia ai pisinisi i auaunaga tau talimalo ma o latou foi sao i tagata femalaga’i. O le faletalimalo e pei ona faailoa i le lipoti e umia e partners e tolu mai Papua Niu Kini.
