E ui ina le manuia le taumafai o le tausala o le atunuu laititi o Nauru, na o se 1,200 le faitauaofai o tagata o loo nonofo ai, ae ua manumalo le ofo a lea atunuu e talimalo i le isi tauvaga e saili ai se tausala o le Pasefika i le tausaga fou 2024.
O le mae’a o le sailiga o se Tausala o Atumotu o le Pasefika na toe talimalo ai Samoa i le faaiuga o le vaiaso na tea nei, na faailoa ai e le komiti o le tauvaga le manumalo o le ofo a Nauru e fia talimalo, ma o le taimi muamua lea ua maua ai e lea atunuu le avanoa e tapena ai le tauvaga mo se Tausala o Atumotu o le Pasefika.
O le tamaitai tauva poo le Tausala a lea motu o le Pasefika le tamaitai o Alexandra Melody Picther, e iai lona sootaga o se tagatanuu Samoa, ona o lona tuaa tina sa manumalo i le Pale o le Tausala o Samoa o le tausaga 1981, o ia lea o Juliana Curry ma ua faamautu nei ma lona aiga i Nauru.
O le tausaga e 1987 na faia ai le uluai tausala o le Pasefika ma sa faaigoa o le tausala o le Pasefika i Saute ma o Samoa na tala malae i le faia o le tauvaga.
O le taimi nei ua suia le igoa i le Tausala o Atumotu o le Pasefika ina ia aofia uma ai atunuu, aua o tausaga ua tuanai sa tele i tausala o atunuu Polenisia sa auai.
