Talimalo alo iloga o Samoa i Amerika i le Manu Samoa taitoafitu (7s) i le mae’a o taaloga a le HSBC i Los Angeles

March 8, 2024
TAALOGA
Tusia: Ayesha Huch

I tala mai le Pasefika a le ABC Network na ta’ua ai, na amata tuufaatasia lea faatasiga e le tamaitai ia Serafina Maulupe i le tausaga ua mavae, ina ua ia faafesiligia le aulakapi a Samoa poo iai ni vaega e moomia e le ‘au a o iai i Amerika.

O le lotonuu lava o le tamaitai ia Sera na ia manatu ai loa e saili alo o le atunuu o loo aumau i Amerika ina ia latou omai faatasi e opogi ma patipatia taumafaiga a le autaitoafitu a Samoa.

O lea na mafai ai ona ia faafesootai sui iloga o le NFL- poo le Hall of Famer Troy Polamalu ma lona faletua.

O iina na valaau ai e lea tamalii le alii taalo o le NFL ia Domata Peko ma si ona tausi o Ana lea na talimalo i le tausamaaga mo le autaaalo a Samoa.

I lea faatasiga na maitauina ai foi le auai o Juju Smith-Schuster ma si ona tuaa ia Sammy, o le sui iloga o le San Fransisco 49ers o Jesse Sapolu ma lona faletua ia Lisa, o le faiaoga ia Shaun Nua, o le tamaitai iloga o le WWE ia Sarona Snuka, o le tuaa o Dwyane “The Rock” Johnson ia Ata Maivia Johnson ae faapea ai ma le alii pese o le Jamoa Jam Lapi Mariner, ma le Pule Sili o le PacifiCast ia Julius Tuigamala.

I lipoti, na faaalia ai le faagaeetia o le tamaitai ia Serafina Maulupe ona o le mafai ona tuufaatasia lea faamoemoe mo tama taaalo, na ia ta’ua ai o se faamoemoe na atagia ai se aiga fealofani.

Na mafai ona alu le tama taalo ma si ona lava mitiafu, aofia ai ma se pulou poo le helmet a le USC (University of Southern California) ua mae’a saunia ma sainia, na faimeaalofa ai le alii o Nua ma Smith-Schuster.

E lē gata i lea ae na mafai foi ona faimeaalofa Smith-Schuster mo le autaaalo ma le pulega ni ofu (jerseys) ua mae’a ona sainia ma se meaalofa tupe.

Māua foi i faamatalaga, sa auai atu le Pule Sili o le Island City Media Ammon Green, na ia faasoa o se fiafiaga tele mo ia lona molimauina o le omai faatasi o tatou tagata e patipatia taumafaiga a tatou ‘au.

Na ia faamanatu ai foi, poo fea lava e malaga pe masii ai a tatou autaaalo o loo tapuaia atu lava e o latou tagata o latou faiva.

Mo le Manu Samoa, na lē faamanuiaina a latou taumafaiga i le vae o le taamilosaga o le HSCB i Los Angeles, ma ua lona 11 Samoa i le faatulagana o autaaalo i le tamilosaga taitoafitu.