Ua talia nei se faaiuga a le faamasinoga o talosaga toe iloilo  poo le faamasinoga apili  i le isi talosaga a le Faatuatua i le Atua Samoa ua tasi e faamanino ai le faaiuga a lea fa’amasinoga na faamautu ai le soloia o le nofoa fa’aopoopo o tamaitai e pei ona sa filifilia ai le afioga ia Aliimalemanu Alofa Tuuau o le sui tauva a le HRPP.

I le maea o folasaga a Loia o itu auai o le mataupu na manino ai e lei faia se folasaga a le Loia na tulai mo Aliimalemanu ma le vaega faaupufai a le HRPP ona ua soloia e le faamasinoga o talosaga apili le nofoa faaopoopo.

Ua na’o le Loia Sili o le Malo o loo tulai mo le Komesina o Faigapalota ma le Loia mai Niu Sila mo le itu talosaga na faia folasaga ma finauga faaletulafono.

Na agai se fesili a le Faamasino Sili Satiu Simativa Perese i loia o itu e lua i le faamatalaina o le tulafono 24 poo le court of appeal rules faasino i galuega a le fa’amasinoga apili lea o loo aiaia ai, a maea loa se faaiuga o le mutaaga lea o se finauga. Na faaalia e le Loia o le itu talosaga o loo iai le vaega o lea tulafono e mafai ai ona suesueina i se tulaga lautele se faaiuga pe a iai ni vaega ua fesiligia e se itu auai.

O le mau a le Loia Sili ma le malo o le vaega lea e fa’asino i se fa’aiuga e le’o manino ai se itu auai i le aofaiga o ni tupe totogi ae lē mo le toe suesueina o le faaiuga atoa.

Sa agai foi finauga a loia i le vaega o le fa’aiuga o loo faapea mai e tālia le fa’aiuga o ni palota laiti pe a maea fa’amasinoga o tagi o fa’atosina e iloa ai pe maua se sui tauva tamaitai e manumalo mai i ia palota laiti e maua ai le numera 6 e atoa ai tamaitai e pei ona aiaia e le vaega 44 o le faavae.

I le ma le tasi itu o finauga fa’aletulafono pe o le a le faauigaina ma le fa’amatalaina o le faaiuga a le fa’amasinoga apili ua maea ona aumai pe tatau loa ona usuia le palemene fou pe faatali sei maea ni palota laiti.

Ua fa’aagaga pe reserve le taimi e tuu mai ai se iuga o lea talosaga.