Ua nofo sauni le faamasinoga sili e tuuina mai sana faaiuga o le a aumai ai ni aiaiga e tatala ai i tua  Edward Eteuati Ulberg o se tamā talavou na nofo taofia i le faaiuga o le tausaga na tea nei ona o le maliu fasia o lona toalua i le taimi o loo mamafa i lona ma’itaga. 

O le Aso Tofi na iloilo ai e le faamaisnoga le talosaga a lē ua molia ina ia tatala i tua e pei ona sa finauina e lana loia ia Muriel Lui. Na tuuina atu fesili a le faamasino le afioga Niava Mata Tuatagaloa i le loia a le itu a leoleo i le fia maua lea o mafuaaga ‘anoa ua faavae ai le latou tetee i le talosaga e tatala i tua lē ua molia. 

Peitia sa ioe le loia a le itu a leoleo i vaega uma na foalsia atu e le faamasino e agavaa ai ona tatala i tua Edward Ulberg ua maea tuuina atu e lana loia lana tetee i moliaga uma e 7 e pei ona faaulu e leoleo. 

O moliaga ia e aofia ai le faoo o le maliu i se tagata, o le moliaga e faamoemoe e faaoo manuaga i se tagata o le moliaga o le faaoolima , umia o se auupega matautia, faao’o manu’a tūgā, fasioti tagata paivalea ma le moliaga o le faaoo o le oti i se pepe e le’i fanau mai.