Ua lē faataunuuina le solo tetee a tausi soifua na fuafua a amata i le asō, ona o lea ua palota ma talia le ofo ua aumai e le Te Whatu Ora mo o latou totogi.
Na saunoa le minisita o le soifua maloloina Ayesha Verrall o lea o le a maua e tausi soifua ma faatosaga le isi siitaga o totogi i lalo o le maliega ua iai nei i le va o le malo ma le New Zealand Nurses Organisation.
O le maliega o loo aofia ai vaega nei –
- Siitaga o totogi mo avanoa faigaluega uma o loo i lalo o le maliega tuufaatasi e $4000, ma e amata aloaia mai le aso 1 o Aperila 2023
- Siitaga e $1000 mo tausi soifua sinia, faatosaga sinia faapea ma tausi soifua lesitala ua ta’ua o nurse practitioner
- Peimeni e $750 i sui uma o le New Zealand Nurses Organisation o loo i lalo o maliega i le taimi na aloaia ai, e ese ai le $500 mo tagata galulue taitoatasi.
O se maliega o le a totogi ai nei tausi soifua sinia i le va o le $114,025 ma le $162,000 ma ona tupu i le tausaga, ae o tausi soifua lesitala i le va o le $75,000+ ma le $106,000 ma ona tupu.
O se tala fiafia i tausi soifua ma faatosaga le faaiuga ua aumai, ae le gata i lea o le mamalu o le atunuu lea na semanu e savavali ese mo le 24 itula sui o le faalapotopotoga o tausi soifua poo le 35,000 tausi soifua mo le 24 itula i le asō faasolo atu i le Aso Tofi.
