O le amataga o lenei vaiaso na valaau ai le mataupu faasaga i le sui faipule o Faleata No.2 le afioga i le Minisita o Pisinisi ma Leipa ma le Kamupanī Vaalele o le Samoa Airways faapea Faalapotopotoga Tumaoti uma a le Mālō, Leatinuu Wayne Sooialo lea na tuuaia e Elikopa Peni i ni faiga faaalatua ao lumanai le palota tele a le atunuu i le tausaga na te’a nei.
O lea faaiuga ua faamamā ai le suafa o le sui faipule mai moliaga e 13 o le faia o ni gaioiga faaalatua ma tuuina atu ai i le loia mo le itu tagi e talosaga e toe ave ai tua moliaga ona ua leai ni mau e lagolago ai. O le mafuaaga lea ua talia ai e le faamasinoga lea talosaga.
O le kilia ai o le suafa o le Minisita mai ia tuuaiga ua faasolomuli ai tua lenei mataupu sa taoto i le faamasinoga faaitumalo ma finauina e se Loia tutoatasi i le faiga tau faamasinoga e taua o le Private Prosecution.
Ua totoe ai nei moliaga faapea o loo molia ai e lē ia tagi le sui faipule o Gagaifomauga No.3 le Minisita o Faatoaga ma Faigafaiva, le Esetete Tausi ma le Nofoaga Suesue Faasaienisi, Laauli Leuatea Polataivao Schmidt faapea le tamaitai faipule o le itumalo faapalota o Lotofaga, le afioga i le Palemia Fiame Naomi Mataafa.
Ua faailoa mai ese molimau faatuatuaina o loo iai foi se fuafuaga e faatino le tulaga lava lenei ua faia i moliaga o le Minisita o Pisinisi Alamanuia ma Leipa i isi mataupu e lua faasaga ia Laauli ma Fiame.
O tuuaiga o le faia o ni gaioiga faaalatua sa tuuaia ai e Elikapo Peni ia Leatinuu, Laauli ma Fiame e mafua ini faalauiloa a le vaega faaupufai a le FAST ao faagasolo faatosina o le palota tele o le atunuu i le tausaga na te’a nei.
