Ua talia ai nei e le afioga i le Ao o le Malo le afioga Tuimalealiifano Vaaleto’a Sualauvi II tusi taualoa o le tofiga o le sui filifilia fou o le Malo o Norway mo Samoa le tamaitai Amapasa o Anne Grete Riise.
O le tasi lea o malo sa fesoasoani mai ia Samoa i le taimi o vevela le pipisi o le faamai misela, lea na auina mai ai se au malaga o fomai e fesoasoani i le Matagaluega o le Soifua Maloloina.
E toa sefuluono fomai sa malaga mai ai ma fesoasoani i le togafitia o fanau a le atunuu na aafia i le misela lea e 83 na fano ai o latou ola ma soifua.
O le tausaga e 1999 na uluai faamautu ai sootaga faavaomalo o Samoa ma Norway ose atunuu e i matu o le atu Europa.
O le Aso Tofi o le vaiaso nei na tuuina atu ai tusi tofiga o le amapasa fou o Norway ao le Aso Tofi ua mavae o le sui o le Malo o Pelesauma ose isi atunuu i Europa, sa tauaao atu ona tusi tofiga ile afioga i le Ao o le tatou Malo.
