O le Aso Lua na momoli aloaia atu ai tusi taualoa o le Tamaitai Komesina Maualuga o Niu Sila i Samoa nei ia Si’alei van Toor i le Ao Mamalu o le Malo o Samoa, Afioga Tuiaana Tuimalealiifano Vaaleto’a Sualauvi II i lona maota i Vailele. 

O le saunoaga a le Ao Mamalu o le Malo na ia faailoa atili ai le faigapaaga i le va o malo e lua, o le aao fesoasoani mai o Niu Sila i poloketi ma fesoasoani tau seleni mo Samoa, o le Se’i o le Quota ma le tele o isi fesoasoani a lea malo mo lo tatou atunuu.

O le agaga fiafia sa faaalia foi e pei ona saunoa le Ao o le Malo ina ua avea ai mo le uluai taimi mai Niu Sila, se tagata e iai sona pito Samoa ua umia lea tofiga i totonu o lo tatou atunuu.

O le tamaitai Komesina sa avea ma Amepasa o Niu Sila i Rusia atoa ai ma le tele o tofiga faavaomalo sa tuu atu iai e le Malo o Niu Sila.

O ia ua sui ai le Susuga Dr Trevor Matheson ua foi i fanua lana faatamasoaliiga.