Ua maitauina e le toatele i le asō tusitusiga ua faia i luga o puipui ma ata i le ofisa o le Premier o Niu Sa Uelese, Chris Minns.
O le ofisa la o le Premier i lona itumalo o Kogarah ua vali mūmū e tagata ma tusitusi ai le upu fasioti tagata i le faaperetania, murder.
Fai mai leoleo na vaaia lea tulaga i le vaveao ma e talitonu ai o le aulagolago ia Palesitina na o latou faatino lea tulaga.
I le feiloaiga a Minns ma tusitala na ia ta’ua ai o le faigata ia ona iloa le tagata ma le mafuaaga na te faatupu ai ni uiga faapea ma o le a faaauau pea ona taulai le vaai a lana faigamalo i le galulue faatasi o komiuniti ma ia iai le filemu i le setete ae lē o le taulai i vevesi o tulai mai atunuu i fafo.
Fai mai Minns e leai sana matafaioi e faia i nofoaga i le lalolagi i fafo aemaise lava i Sasae Tutotonu ae iai lana matafaioi e fai i Sini ma lona setete ina ia faatumauina le filemu.
Puna o Faamatalaga: https://www.9news.com.au/national/nsw-premier-chris-minns-hits-out-at-protesters-after-office-vandalised/5327ba60-4d01-4f25-b664-8cf05d2d3a36
